Muzeu Etnografik i Beratit - Into Albania

Muzeu Etnografik i Beratit

Turizëm Kulturor

Muzeu Etnografik i Beratit

Turizëm Kulturor

Një shëtitje në jetesën dhe zakonet e banorëve të Beratit

Imazhit turistik të Beratit prej 40 vitesh i është shtuar një muze interesant i cili tregon mbi jetesën dhe zakonet e përditshme të banorëve të qytetit.

Muzeun Etnografik i Beratit është i vendosur brenda mureve të një banese tipike beratase që i përket shekullit të 18-të. I përshtatur në dy katet e shtëpisë, që ndodhet në ansamblin muzeal të qytetit të konsideruar Trashëgimi Botërore e UNESCO-s, ky muze shfaq për publikun pavione të lidhura organikisht me njëri-tjetrin, të cilët sjellin një panoramë të plotë të kushteve të jetesës, zakoneve të përditshme të banorëve të qytetit dhe nivelin pasuror të tyre.

Arkitektura e Muzeut Etnografik të Beratit. Foto nga IntoAlbania.

Arkitektura

Arkitektura e jashtme e ndërtesës tregon për nivelin zhvillimor ekonomik të familjeve të mëdha të Beratit të më shumë se 200 viteve më parë. Imitimi i pazarit të vjetër të Beratit me dyqanet e qëndistarëve, punuesve të drurit, punuesve të metalit, sjellin në ditët tona ngjyrimet e kohërave të shkuara, ku puna e dorës kishte një rol parësor në burimet e jetesës dhe tregtisë. Një pus i vjetër në oborr të shtëpisë është një objekt që karakterizon jo vetëm shtëpitë e Beratit, por e gjen gjerësisht të përhapur në Shqipëri.

Imitimi i pazarit mesjetar, me veshjet tradicionale të krahinës të paraqitura në katin e parë të muzeut. Foto nga IntoAlbania.

Jeta Beratase

Mënyra sesi jetonin vendasit tregohet në katin e dytë të Muzeut ku objekte të vjetra janë shpërndarë në ndarjet e shtëpisë për të rrëfyer në heshtje sqimën e dhomës së miqve, dhomën e gatimit dhe përgatitjes së të gjitha vakteve të ditës, dhomën e punës së dorës që kryhej nëpërmjet tezgjahut.

Çardaku

Konsiderohet si hapësira më e rëndësishme në banesë, me qoshkun ku gjenden mindere, qilima e velenxa. Tek sa pjesa tjetër e banesës është e gjitha e ndërtuar me gur, këtu është druri elementi kryesor i ndërtimit. Shpesh në këtë ambjent punohej dhe tezgjahu. Në shtëpitë karakteristike të qytetit kjo hapësirë zihej kur shtohej familja, e ndihmonte për të krijuar mjedise të tjera banimi të nevojshme. Kjo hapësirë në muze është pasuruar edhe me orendi të vogla shtëpiake që shërbenin për të gostitur miqtë apo të zotët e shtëpisë kur kishte ngjarje të mëdha në familje.

Çardaku, foto nga IntoAlbania.

Një ndër dhomat më interesante që mund të vizitoni në muze është Dhoma e fshatit, krijuar apostafat për miqtë burra. Dhoma dominohet nga sofra e ushqimit dhe oxhaku. Ajo që ngjall kuriozitet është fakti se po në këtë dhomë ndodhet dhe dollapi i rrobave, ndërkohë që enët janë vendosur mbi tartabenë.

Dhoma e fshatit, foto nga IntoAlbania.

Dhomat e tjera që mund të vizitoni përfshijnë Dhomën e tezgjahut, Kuzhinën, Dhomën e miqve në Berat etj. Në muze autoritetet ruajnë rreth 1200 objekte të trashëgimisë kulturore, të shpërndara estetikisht bukur në sergjenë, dollapë, kanate dritaresh apo pranë oxhakut të bardhë të dekoruar me modesti nga etnografët.

Të gjitha orenditë janë të përmasave të përshtatshme për një muze impresionues që të tërheq duke nisur nga oborri dhe muret rrethuese. Muzeu është ndalesa e padiskutueshme e grupeve të turistëve të huaj dhe shqiptarë që njohin në këtë njësi domethënëse kulturore sjelljen bazike të kësaj pjese të Shqipërisë. Muzeu Etnografik i Beratit është pjesë e rrjetit të muzeumeve më identifikuese të pellgut të Adriatikut.

 

 

Nga: IntoAlbania

  • Orari i vizitave Nga e marta në të diel 09:00-16:00 (15 tetor-30 prill), 09:00-18:00 (1 maj-14 tetor) E diel 09:00-14:00
  • Adresa: Rruga e Kalasë Orientohu në hartë
  • Bileta e hyrjes: 200 lekë bileta normale. 100 lekë për pensionistët, veteranët e Luftës që kanë dëshmi zyrtare, ish të dënuarit dhe të përndjekurit politikë të sistemit komunist, invalidët dhe jetimët. 60 lekë për studentët dhe nxënësit. Falas për fëmijët nën 8 vjeç.
  • Kohëzgjatja e vizites: 1 orë

Çfarë ofron Berat

Të ngjashme

Të rejat

Zhvilluar nga Frakton & Dizenjuar nga project.graphics