Shpella e Piratëve - Into Albania

Shpella e Piratëve

Turizëm Detar

Shpella e Piratëve

Turizëm Detar

Cave of the Pirates

Njihuni me një destinacion vërtet inspirues të Shqipërisë

Një nga vendet që ka ndikuar imagjinatën kolektive të shqiptarëve, përmes njërit prej librave më të dashur.

Shpella e Piratëve ka frymëzuar shkrimtarin shqiptar Petro Marko që i ka kushtuar një libër me të njëjtin titull dhe më pas një film fantastik ku protagonistë janë femijët. Shpella ngjall fantazitë e gjithkujt që e viziton duke ta bërë të lehtë udhëtimin që nga kohërat e lashta kur piratët e detit strehoheshin poshtë shkëmbinjve të plazheve të Dhërmiut për tu shpëtuar erërave të Jonit ose për të pushuar pas lundrimeve të gjata.

Cave of the Pirates

Burimi i fotos: sq.wikipedia.org, Albinfo.

Shkëmbinj rozë

Shpella është një guvë e lartë gjysëm rrethore që kulmon në majën e saj me një të çarë tjetër, si oxhak nga hyn drita e diellit. Tavani i hapur i shpellës ajros muret e brendshme dhe krijon tjetër atmosferë që shijohet nga guximtarët që duan të provojnë kredhjet në këtë hapësirë detare të fshehtë. Hyrja në shpellë është krijuar nga shkëmbinjtë gëlqerorë dhe i ngjan një porte natyrale guri. Uji blu i detit, transparent deri në thellësi, bashkohet me ngjyrën rozë të shkëmbinjve që janë ngjyrosur si me dorë nga rrahja e kripës.

Vendndodhja

Shpella ndodhet poshtë kodrinës ku ngrihet Manastiri i Shën Todhrit në Dhërmi. Vera është koha ideale për ta vizituar sepse deti është i qetë dhe lundrohet lehtë. Ndryshe është në dimër kur dallgët që përplasen furishëm në shkëmbinjtë e shpellës e bllokojnë hyrjen e saj. Të apasionuarit pas ngjitjes së shkëmbinjve mund të kacavirren në muret e brendshme të shpellës për të dalë nga çarja në tavan sipër kodrinës së Dhërmiut.

Banorët e zonës thonë se shpella nuk është eksploruar në brendësi pasi thellësitë e ujërave rreth saj ka shpesh edhe ndalesa për peshkaqenë. Shpella është lehtësisht e arritshme edhe nga plazhi i Jalit por sigurisht pjesa më argëtuese do të ishte të kundroje nga lart mbi kodër, thellësinë e ujërave poshtë në shpellë.

 

 

Nga: IntoAlbania

Çfarë ofron Vlora

Të ngjashme

Të rejat

Zhvilluar nga Frakton & Dizenjuar nga project.graphics