Book Your Stay
Book Your Flight
Përjetimi i një udhëtimi të organizuar plot bukuri, kulturë e aventurë nga Struga e Maqedonisë në disa qyete, fshate, liqene e male të Shqipërisë.
ShBE Shkupi dhe KAB Struga nxisin dashurinë ndaj natyrës dhe bukurive të saja nëpërmjet ecjeve në bjeshkë e male apo edhe udhëtime me biçikleta. Në një udhëtim të tillë sfidues u nisa bashkë me miqtë, fillimisht nga Struga drejt Pogradecit për një nga udhetimet më të bukura të këtj gushti.
Mendimet për atë që do të shohim dhe freskia e udhëtimit përskaj liqenit të Ohrit na i bënë këto 40 km shumë të lehta. Pasi kaluam plazhin e populluar të Pogradecit, lame pas qytetin dhe fshatin Gështenjas duke hypur në kodrën e rradhës. Vazhduam nëpërmjet Leshnicës dhe Çërravës për të kaluar në një fushë pjellore e cila ujitej nga rezervuari i Pretushës e që dukej si një liqen artificial. Aty pamë një tufë dhensh duke e shuajtur etjen e gushtit në atë rezervuar uji.
Në f.Gurbardhë, u ndalëm në një shitore për të shuar etjen e oreksin e më pas vazhdua drejt fshatit Zvezdë, i cili na drejtoi në një rrugë gjarpërore e të pjerrët për nga ana e Prespës. Ishte mundimi i fundit drejt maleve të Parkut Kombëtar të Prespës, me një lartësi mbidetare prej 1076 m. Kur para nesh u shfaq kaltërsia e liqenit të Prespës dhe ishulli i Maligradit, krejt lodhja e vozitjes 6 orëshe sikur u zhduk. Duke na qeshur fytyrat, gjetëm vend për t’u ndalur dhe dokumentuar këtë pamje mbresëlënëse.
Pas pak arritëm në Lajthizë, e më tej, duke kaluar përreth shumë gomerëve, arritëm në Liqenas (ose Pustec siç i thonë vendasit në gjuhën e tyre maqedonase), saktësisht pas 90 km. Disa mbishkrime dygjuhësore të Komunës, spitalit dhe emërtimit të rrugëve na kujtuan se këtu jetojnë minoritarët. U drejtuam drejt Zaroshkës e plaxhit të saj, ku një tabelë na thoshte se aty ka hotel. Fillimisht, zonja e “hotelit” nuk deshi të na pranojë sepse, sipas saj, hoteli nuk i kishte kushtet për ne, pasi nuk kishte kondicioner apo televizor. Pas një buzëqeshje nga ne dhe shpjegim se ne jemi bjeshkatarë e na nevojitet vetëm pastërti, u kuptuam.
Pak më vonë, Ljubeja, një djalosh që punonte në Komunë, e në kohën tjetër për të fituar më tepër, shëtiste turistët e rrallë me varka, na dërgoi deri në ishullin Maligrad. Horizonti i bukur i liqenit dhe maleve përreth thjesht na magjepsën. Një javë më herët, aty në ishull te Kisha e Shën Mërisë nga viti 1369, kishte mbajtur një koncert të shkurtër Inva Mula.
Pasi kaluam natën në Zaroshkë, të nesërmen, u nisëm për në Glloboçen, një nga 9 fshatarat me minoritarë. Pse? Kishim dëshirë të vizitonim shtëpinë e lindjes dhe fëmijërisë së shkrimtarit të madh Sterjo Spasse. Glloboçenasit nuk fshehnin kënaqësinë për vizitën tonë në fshatin e tyre, dhe me kënaqësi na drejtuan tek shtëpia e kërkuar. Atje takuam nipin e shkrimtarit dhe pamë shtëpinë e vjetër e të pabanuar që rrinte vetëm si një monument për një kohë tjetër.
Rrugëtimin e këndshëm e vazhduam duke lënë Shqipërinë pas, të ngarkuar me shumë kujtime. Në Maqedoninë veriore, hymë në f.Stenje për pushim dhe freskim të shkurtër rreth plazhit simpatik. Këtu na priste ngjitja më e madhe në këtë rrugëtim, mali Galiçica, me lartësi në rrugë 1593 m. Aty shijuam pamjet e bukura të liqenit të Prespës. Pishat e larta e të gjelbërta na bënin hije për pushimet tona të shkurta e të shpeshta. Ah, më në fund na doli përpara liqeni i Ohrit, Trpejca dhe Pogradeci nga një perspektivë tjetër, e lartë. Lëvizja e njerëzve edhe parashutistët me ngjyrat e larmishme e kompletonin këtë mozaik ngjyrash mbi liqenin e kaltërt. Vijonte ajo që kurrë nuk e kisha menduar: zbritja me shpejtësi teposhtë me biçikletë, që në disa sekuenca arrinte 50 km/h. E për këtë ja vlente mundi, për këto 30 minuta adrenalinë. Rruga e mbetur deri në Strugë ishte rutinë nëpër plazhet e bukura të Ohrit. Kthimi i bukur i një udhëtimi të paharrueshëm.
Strugë (qytet në Maqedonin e Veriut) – Pogradec – f.Çërravë – f.Gurbardhë – f.Zvezdë – Parku Kombëtar Prespë – f.Liqenas – f.Zaroshkë ku edhe kalohet nata, pastaj vazhdohet për f. Glloboçen – f.Stenje (në Maqedoni) – mali Galiçica – f.Trpejca – Ohër – Strugë.
Artikull nga Fitim Hoxha
Nëse jeni në kërkim të një vendi ku ju mahnitë me detin, liqenin, lumin, natyrën e egër, turizmin bregdetar, historik...
Read More
Dibra e pasur me traditë, kulturë dhe histori është e njohur edhe për peizazhet natyrore. Diversiteti i natyrës dibrane i...
Read More
Stina e dimrit dhe magjia e saj shijohen më mirë në Korçë, jo vetëm në sokaket e qytetit, por në...
Read More