Book Your Stay
Book Your Flight
Të gjithë ne kemi qenë dëshmitarë të ndryshimit që kanë pësuar bibliotekat publike, në lagjet e Tiranës. Të krijuara dhe konceptuara sipas një forme të njëjtë estetike, me ngjyrën e verdhë të fortë që të tërheq sa e shikon, ato ofrojnë në brendësi mjedise sa të ngrohta e paqësorë, aq dhe pozitive.
Nëse doni të kuptoni mënyrën e të jetuarit, kulturën, e traditën e një qyteti, nuk e gjeni vetëm tek stili i të veshurit, apo çfarë lokalesh frekuentohen, por duhet të prekni bibliotekat.
Synimi i rihapjes së bibliotekave të lagjes, është rikthimi i vitalitetit, në mënyrë të tillë që të ndërgjegjësojnë qytetarët ndaj kulturës së leximit, në një kohë kur flitet shpesh për humbjen e raportit libër-lexues. Në ditët e sotme katër prej bibliotekave janë në funksion të plotë, ndërkohë katër të tjera janë në punime e sipër për t’ju dhënë imazhin e ri si dhe për t’u pasuruar me titujt e shumtë. Si një hapsirë që synon zhvillimin e njohurive, ato po rigjejnë funksionet e tyre, jo vetëm si ambjente leximi, por dhe në hapsira studimore e takime të ndryshme me njerëz të botës së penës.
Biblioteka “Musine Kokalari”, është ndër të parat ambjente të rikonstruktuara dhe ndodhet përgjatë unazës, në afërsi të shkollës Vasil Shanto. E rihapur në fillim të vitit 2018, ajo ka ekzistuar si bibliotekë që në vitin 1968. Në të mund të gjesh të gjitha zhanret si roman, novelë, tregime e poezi, nga letërsia shqipe dhe e huaj. Klikoni këtu për të gjetur vendodhjen.
Biblioteka “Petro Zheji” e pozicionuar përballë shkollës Harry Fultz, në brendësi të lagjes, ka marrë një formë të re duke u shëndërruar në një ambjent të ngrohtë të dijës. Si bibliotekë ajo nuk është mbylluar asnjë ditë që nga data e krijimit në vitin 1973 dhe sot e kësaj ditë në të mund të gjesh fondin e librave si të vjetër ashtu dhe të rinj. Klikoni këtu për të gjetur vendodhjen.
Mund të themi që është një ndër bibliotekat më të mëdha dhe më aktivja në organizimin e aktiviteteve që kanë për bazë librin. Kjo bibliotekë është afër shkollës së Kuqe, dhe dikur ka qenë salla e leximit nr 3 të Bibliotekës Kombëtare. E ndarë në 3 mjedise, salla e madhe e aktiviteteve ku janë edhe autorët shqiptarë, salla ku janë autorët e huaj të përkthyer në shqip dhe salla e tretë ku është libri për fëmijë dhe libri në gjuhë të huaj. Në këtë bibliotekë, fondi është shumë i pasur me botime të vjetra, mes tyre edhe ekzemplarë të rrallë ku mund të përmendim botimin e Hamletit në shqip i vitit 1943. Klikoni këtu për të gjetur vendodhjen.
Biblioteka “Misto Treska” e cila ndodhet mbrapa kafe Florës, pranë rrugës së Durrësit, është ndër ato biblioteka, e cila i është nënshtruar rregullimit, duke unifikuar të njëjtën pamje vizive si më bibliotekat e tjera. Ajo është krijuar që në vitin 1963 dhe ka pasur një veprimtari me shkëputje. Në vitin 2018 pati rikonstruktimin e fundit dhe sot në të ka një fond të pasur me tituj të cilët kanë qenë pjesë e bibliotekës dhe një pjesë e dhuruar. Klikoni këtu për të gjetur vendodhjen.
Është interesant fakti që vetëm në 6-mujorshin e parë të këtij viti, numri i regjistrimeve të reja është 2-fishuar në krahasim me vitin 2018 dhe kjo kuptohet fare lehtë, pasi në çdo orë të ditës aty do të gjesh lexuesin, nga më i vogli tek më i madhi. Dhe për çdo person që ndoshta nuk e di, bibliotekat i gjen të hapura çdo ditë nga e hëna në të shtunë nga ora 8.00 deri në 19.00.