Kultivimi e ruajtja e artizanatit, kryesisht të sixhades, është një traditë e vjetër kuksiane, të cilën me shumë mund gratë e kësaj zone po e trashëgojnë brez pas brezi.

Si një nga traditat më të çmuara, realizimi i sixhadeve kuksiane ka karakteristikë punimet popullore, me kombinimet shumëngjyrëshe të motiveve të ndryshme, kjo i bën ato të veçanta dhe më autentike, në krahasim më zonat e tjera të Shqipërisë.

Zhvillimi i një tradite të vjetër familjare

65 vjeçarja Hate Ora është ndër ato artizane, që jetën nuk e shikon të shkëputur nga realizimi i sixhadeve. Prej 4 brezash ajo e trashëgon këtë zanat, e sot ia ka mësuar vajzës dhe mbesave të saj. Madje thekson se edhe nëna e saj, 80 vjeçare punon ende në realizimin e sixhadeve.

Duhet theksuar se një ndihmesë të madhe në kultivimin e këtij zanati e pati edhe ndërrmarja e parë e artizanatit në vitin 1951 (në Kukësin e Vjetër).

Një pjesë e madhe e punimeve të sixhadeve ka kaluar kufijtë e krahinës dhe vendit, duke prezantuar Shqipërinë me dinjitet në panairet e Europës.

Në të u punësuan shumë gra të kësaj zone të cilat morën zanatin dhe me mbylljen e kësaj ndërrmarje pas viteve ’90 janë munduar ta ruajnë me shumë mundim, duke ndërthurur në realizimin e sixhadeve tradicionalen me populloren.

Mbajtja gjallë e traditës

Hate është një nga ato zonja kuksiane që ka arritur ta mbajë gjallë këtë traditë. Në një ambjent modest ajo pret porosi për realizimin e sixhadeve, qilimave apo edhe të rrugicave, të cilat kanë si synim jo vetëm tregun shqiptar, por dhe atë jashtë.

Hate na shpjegon se realizimi i tyre nuk është i lehtë, jo vetëm për mundin fizik, por edhe për zbërthimin e punimit, matjet e duhura, të cilat kërkojnë një punë intensive paraprake. Realizimi i një sixhadeje sigurisht që kërkon kohë dhe ajo varet nga densiteti i nyjeve, nëse ato do të ndërtohen me një densitet të imët, sigurisht që kërkon shumë kohë pasi punohet me fije të hollë sa një fije floku.

Ka raste që punimi i një sixhadeje mund të kërkojë edhe dy vjet kohë, në varësi të modelit, punimit, densitetit dhe dimensionit, na shpjegon zonja Hate.

Realizimi i sixhadeve është kthyer në një markë të pazëvendesueshme, që mban emrin dhe pasionin e zonjave kuksiane.

Punime Artizanale Ora i gjeni në:

Rruga “Universiteti” Kukës

tel: 0685211088