Është kthyer në traditë tashmë organizimi i ‘MIK Festival”, por në edicionin e tij të tretë për shkak të pandemisë dhe rregullave strikte që duhen zbatuar kulmoi dhe u përmbyll në një ditë të vetme në ishullin e Maligradit.

Mes magjisë dhe tingujve ky, festival i muzikës internacionale ndryshe nga sa ka ndodhur vitet e tjera është zhvendosur, nga Korça në ishullin e Maligradit në Prespë. Nën titullin Miqtë e Prespës, eventi i krijuar nga sopranoja e famshme Inva Mula këtë herë erdhi në një mënyrë krejt origjinale në një kishë të vjetër.

Muzika rinashimentale  dhe  ajo baroke u lidhën shumë bukur me kontekstin. Programi ishte i konceptuar i tillë,  që  të prekte të  gjitha vendet ku ka lulëzuar muzika Baroke. Ishte një event që bënte bashkë dashurinë për artin, kulturën, historinë dhe trashëgiminë. Një event i cili kishte si qëllim zhvillimin e turizmit dhe promovimin e njohjes së zonës së Prespës në tërësi.

Një koncert sa i veçantë aq edhe origjinal, ku natyrshëm me bukurinë që të fal ishulli i Maligradit në liqenin e Prespës rrodhën magjishëm tingujt e muzikës baroke.

Programi ishte konceptuar ne mënyrë të atille që të prekte të gjitha vendet ku ka lulëzuar kjo muzikë, si Gjermania, Italia, Franca dhe Spanja duke u interpretuar pjesë të autorëve më të njohur të këtyre vendeve pikërisht në kishën e Shën Mërisë, e cila mendohet se i përket vitit 1300.

Në intervistë për mediat sopranoja Inva Mula është shprehur se koncerti në një Kishë të tillë ishte një realitet i panjohur i cili duhet promovuar si një vlerë e trashëgimisë së kulturës sonë.

Mik Festival i cili vitet e tjera është organizuar për 5 netë radhazi në Korçë duke sjellë emra të njohur të muzikës botërore, do të shtyhet për në muajin shtator për shkak të pandemisë.