Nëse doni një çlodhje të plotë nga rutina, provoni të shkëputeni nga jeta monotone për të përjetuar disa emocione të pakrahasueshme në rrënjët e qytetërimeve të lashta Ilire në Shqipëri.

IntoAlbania dhe One Telecomunication, ju fton në një udhëtim pas në kohë në qarkun e Fierit, të rrethuar nga disa prej qendrave më të rëndësishme të qytetërimeve të lashta, kulturës, historisë dhe sigurisht natyrës së mrekullueshme.

Vizitë në Tokat e Taulantëve ku mbretëron Apollonia

Padyshim që vizita juaj e parë, e cila do t’ju bëjë të shijoni copëza nga e kaluara të ndërthurura me një pamje të jashtëzakonshme të bregdetit të Adriatikut, është Apollonia. I shpallur si Park Arkeologjik, ky është edhe parku më i madh i këtij lloji në Shqipëri. Emrin e mori në nder të perëndisë Apollon dhe u themelua në fillim të shek. VII para Krishtit në tokat e Taulantëve, nga kolonizatorët grekë që vinin nga Korinti.

Ndër 24 qytete në të gjithë mesdheun që mbanin këtë emër në antikitet, Apollonia e Ilirisë ishte më e rëndësishmja dhe luajti një rol të madh si ndërmjetëse tregtare mes helenëve dhe ilirëve.

Në një dimesion tjetër, Apollonia mund të shihet brenda manastirit të saj, i cili sot është kthyer në muze arkeologjik. Aty gjenden të ekspozuara rreth 800 objekte, duke e kthyer atë në një nga muzetë më të pasur në Shqipëri.

Bylisi, qyteti më i madh i Ilirisë Jugut

Jo më kot thamë që Fieri rrethohet nga gjurmë të shumta të antikitetit!

Shumë pranë tij ndodhet edhe një tjetër park arkeologjik tejet i rëndësishëm, ai i qytetit më të madh në Ilirinë e jugut, Bylisit. Rrënojat e teatrit, stadiumit, dy shëtitoreve dhe të banesave të ndryshme, dëshmojnë zhvillimin që në shek. e IV para Krishtit dhe janë pjesë e trashëgimisë kulturore më e veçantë në vendin tonë.

Manastiri i Ardenicës, nga martesa e Skënderbeut tek biblioteka unike

Në qarkun e Fierit, përgjatë rrugës Fier-Lushnje ndalesa është Manastiri i Ardenicës. I pagëzuar nga vendasit si “Kështjella e Myzeqesë”, ky objekt kulti i fesë ortodokse, qëndron plot hijeshi në majë të kodrës më të lartë të zonës, i rrethuar nga qiparisët e lartë që i japin edhe më tepër hijeshi. Dyshohet se përpara ndërtimit të Manastirit, aty gjendej një tempull pagan kushtuar perëndeshës së gjuetisë dhe motrës së Apollos, Artemisa.

E pikërisht prej saj do të rridhte dhe emri Ardenicë. Fillimisht ndodhej vetëm Kisha e Shën Triadhit, ajo që rreth shek. të X-të la gjurmën e parë të krishtërimit dhe më pas u ndërtua edhe Manastiri. E dhëna më interesante historike është kurorëzimi në martesë i Skënderbeut me Donikën në prill të vitit 1451. Gjatë shekullit të XVII-të – XVIII-të, Manastiri u bë i njohur dhe për bibliotekën e tij të pasur, i cili kthye në një vatër të rëndësishme të mësimit të gjuhës shqipe.

Natyra e Egër, pyje, pisha e det i pastër  

Mbas vizitave në këto qendra me rëndësi historiko-kulturore, me siguri do të dëshironi të çlodheni dhe pse jo të shijoni edhe natyrën e mrekullueshme. Krahas plazhit të Semanit dhe Darëzezës, IntoAlbania sugjeron të vizitoni plazhin ende jo shumë të njohur të Pishë Poros. Kjo zonë e mbrojtur natyrore, karakterizohet nga pyje me pisha dhe një det të pastër në të cilin ja vlen të shijoni një zhytje dhe të pushoni mbas një dite fantastike ndjesish lashtësie.