Lezha Turistike - Një Kështjellë Në Ajër, Syri i Djathtë i Durrësit - Into Albania

Lezha Turistike – Një Kështjellë Në Ajër, Syri i Djathtë i Durrësit

Lashtësia dhe ngjarjet historike të qytetit të Lezhës, lënë gjurmë tek ata që zgjedhin ta vizitojnë.

Në këtë qytet Skenderbeu themeloi shtetin e parë të Arbërit me Besëlidhjen e Princave në 1444 dhe fakti se këtu prehet përjetësisht heroi ynë kombëtar, e bëjnë Lezhën edhe më të veçantë.

Më tej, janë pasuritë kulturore dhe natyrore ato që rrëmbejnë zemrat e vizitorëve së bashku me traditat gastronomike të zonës.

IntoAlbania dhe One Telecomunication, ju fton në një udhëtim në qytetin e Lezhës, për të dëshmuar lashtësinë, historinë, kulturën dhe sigurisht natyrën e mrekullueshme që e rrethon.

Memoriali i Skënderbeut dhe i Besëlidhjes së Lezhës

Në qendër të qytetit gjenden këto dy memoriale të rëndësishme historike, që lidhen me epokën e lavdisë së Shqipërisë.

Memoriali i Besëlidhjes së Lezhës, përfaqëson një nga ngjarjet më të rëndësishme të historisë së popullit shqiptar, ku Skënderbeu bashkoi princat shqiptarë në luftë kundër pushtimit Osman.

Ndërsa Memoriali i varrit të Skënderbeut, u ideua dhe u ndërtua në vitin 1981, mes një zone të pasur arkeologjike, nga skulptori i mirënjohur Odhise Paskali dhe arkitekti Latif Lazimin.

Kalaja e Lezhës

Historiania bizantine Ana Komnena e quajti kështjellën “Një kështjellë në ajër, syri i djathtë i Durrësit”, për vetë rëndësinë strategjike që ajo kishte.

E ndërtuar mbi një kodër, kalaja sheh qartësisht vijën bregdetate të Adriatikut dhe lagunat përreth. Dhe është një prej monumenteve kulturore e historike më interesante për tu vizituar.

E nëse jeni me fat dhe arrini ta vizitoni gjatë orëve të vona të pasdites, nga “Kalaja në ajër”, do të mund të shijoni pamjen mbreslënëse të bregdetit nën rrezet e arta të perëndimeve.

Vizitë në Tokën e Shenjtorëve

Zadrima e Lezhës quhet ndryshe edhe Toka e Shenjtorëve. Kisha e Shën Premtes në Balldren, Kisha e Zojës Nunciatë në Lezhë, Kolegji i Troshanit, Kisha e Shën Eufemisë në Kallmet, Kisha e Shën Venerandës në Pllanë dhe Kisha e Martirëve në Blinisht, janë motiv për turizmin fetar dhe kulturor.

Shtëpia e At Gjergj Fishtës

Vendi ku poeti i madh kaloi periudhën e hershme të jetës së tij, ndodhet mbi një kodrinë të fshatit Fishtë të Lezhës. E restauruar vetëm vitet e fundit, kjo shtëpi muze e shpallur monument kulture, është një dëshmi e gjallë e poetit, atdhetarit dhe françeskanit të madh At Gjergj Fishta.

Vizitë në pikat e artizanëve

Në qendër të qytetit do të mund të vizitoni  Qendrën e Artizanatit – Artistike-Zadrima.  Aty gratë e zonës realizojnë punime artizanale tekstili, rroba dhe aksesorë të ndryshëm, duke ruajur kështu edhe këto tradita të mrekullueshme kulturore dhe artisitke.

Ndërsa në fshatin Krajë, do të mund të përjetoni disa momente të bukura kur të shihni se si zhvillohet një nga format më të vjetra të artit në botë, që është Poçeria.

Eksplorim nëpër lumenj, laguna dhe plazhet shëruese

Lezha rrethohet nga male, laguna, deti, lumenj, përrenj, liqene artificialë, kodrina, fusha dhe gjithçka që natyra mund të krijojë. Ndaj edhe aktivitetet që mund të ushtroni janë të shumta!

Ju mund të provoni të peshkoni në grykëderdhjen e lumit Drin, por edhe të vozisni në lumë.

Gjithashtu mund të vrojtoni shpendët e ndryshëm në platformat e ngritura enkas në lagunën e Vainit.

Mali i Velës dhe ai i Rrencit, mirëpresin adhuruesit e ecjeve malore, duke iu dhuruar pamje të jashtëzakonshme.

Ndërsa bregdeti ofron një hapësirë të madhe plazhesh me pyje, rërë kurative, peizazhe të mrekullueshme dhe mundësi zgjedhjeje që i përshtatet çdo individi apo familjeje. Ndër më të frekuentuarit janë plazhi i Tales, ai i Shëngjinit dhe Rana e Hedhun.

Mos u largoni pa shijuar gatimet e traditës

Produktet lokale, pjatat tradicionale dhe kreative, si edhe mikpritja për çdo mysafir, janë arsyet për të cilat çdo vit e më shumë Lezha po bëhet destinacioni më i kërkuar i kuzhinës. Kulinaria nis nga produktet e detit dhe vijon drejt pjatave me produkte të freskëta fshati. “Rapsodia”, “Mrizi i Zanave” dhe “Hoteli i Gjuetisë”, janë disa nga vendet ku mund të shijoni gatime fantastike, por edhe natyrën që i rrethon.

New & Trending

Choose a