Prej disa ditësh Bashkia e Tiranës ka ndërmarrë një nismë, ku në qendër të saj janë të vegjlit. Me logon “Operacioni Kutia” fëmijët e çdo grupmoshe janë vendosur në aksion, me synimin; të mbledhim sa më shumë dhurata, për të gjithë bashkmoshatarët e tyre, të prekur nga tërmeti i 26 nëntorit.

Pjesë e kësaj nisme mund të bëhet çdo fëmijë, jo vetëm shkollat 9-vjeçare, por dhe gjimnazet e Tiranës

Si duhet të veprojnë? Mjaftojnë të marrin një kuti këpucësh, të vendosin në të dhuratat, pa harruar emrin, moshën dhe urimin që lidhet me festat e fundvitit. Nga fëmijët tek fëmijët, është dhurata më e bukur për t’ia bërë sa më të gëzueshme këto ditë, fëmijëve të zonës së Thumanës, Durrësit, Lezhës, Laçit dhe vendeve të tjera të prekura nga tërmeti.

Kjo nismë u përqafua shumë shpejt nga shkollat e Tiranës, të cilat kanë realizuar disa operacione “Kuti-sh,” për të përcjellë copëza nga lumturia e tyre tek shokët apo shoqet e prekur nga tërmeti.

Janë rreth 84 shkolla të qytetit të Tiranës që janë bërë pjesë e Operacionit Kutia, ku kanë grumbulluan një mal më dhurata. Përveç simbolikës që ka ky organizim, nxit tek fëmijët dhe ndjenjën e mbështetjes, solidaritetin dhe bujarinë.

Këto ditë do të fillojë dhe shpërndarja e dhuratave tek fëmijët e prekur nga tërmeti për të sjellë sa më shumë buzëqeshje dhe ngrohtësi tek ata, që sot kanë më shumë nevojë se kurrë.