Mund të themi që është periudha më bukur e vitit! Çdo qytet merr një tjetër pamje nën petkun e dritave vezulluese, që simbolizojnë ardhjen e festave të fundvitit. Si çdo vit, në fillim të dhjetorit në çdo qytet kryhet tradita e ndezjes së dritave.

Pas tërmetit që tronditi Shqipërinë, ndezja e dritave erdhi si mesazh i shpresës dhe vazhdimësisë së jetës.

Për t’i shijuar me më shumë pasion dhe magji, ju sugjerojmë disa nga qytetet që ju ofrojnë atmosferë festash.

1.Tirana

Atmosfera e stinës së festave është ndezuar në të gjithë Tiranën. Sheshi Skënderbej është vendi që pret dhe dekorin më të rëndësishëm të këtyre ditëve. Jo vetëm pema e madhe e fundvitit, por dhe Fshati i Festave është ngritur në këtë hapësirë për t’i bërë sa më të ngrohta këto ditë. Sigurisht nuk qëndrojnë mbrapa dekorimet e Pazarit të Ri, Bulevardit Dëshmorët e Kombit si dhe Kalanë, që e kanë kthyer Tiranën në qytetin e shumë ngjyrave.

2. Korça

Korça, e cila në këtë periudhë ka edhe numrin më të madh të vizitorëve, sigurisht që nuk mund të lihet jashtë kësaj liste. Nën mesazhin e solidaritetit turistë, vendas dhe të huaj kanë përjetuar atmosferën e ngrohtë të ndezjes së dritave. Edhe këtë vit atraksion për vizitorët do të jetë pista e patinazhit në qendër të qytetit, dekori i dritave, të cilin e gjeni përgjatë pedonales së qytetit, si edhe tek Pazari i Korçës. E nëse do të shkëputesh nga Tirana, Korça është gjithmonë qyteti që e sjell më të bardhë atmosferën e festave.

3. Durrës

Një ndër qytetet më të prekura nga tërmeti ka gjetur forcat të rimarrë veten dhe hijeshinë që i takon. Durrësi ka lënë pas hijën e errët dhe është vezulluar më shumë se kurrë. Jo vetëm sheshi qendror por edhe disa lagje të qytetit bregdetar janë rigjallëruar me ndezjen e dritave, si simbol të jetës.

4. Elbasan

Qyteti simbol i Festës së Verës di ta sjellë bukur edhe magjinë e dimrit. Qendra e Elbasanit shndrin më shumë se kurrë, duke i dhënë qytetit një tjetër dimension. Pema e Vitit të Ri dhe dekoret që janë bërë përreth Kalasë i kanë dhuruar Elbasanit një tjetër pamje.

5. Berat

Berati i një mbi një dritareve, shfaqet dhe më i bukur në këto prag festash. Asnjëherë nuk është një ide e keqe të vizitosh Beratin në këtë periudhë. Berati është gjithmonë një atraksion më vete. Me lagjet e vjetra, kalanë dhe muzeun, mbetet qyteti që vizitohet në çdo stinë.

Kjo magji ka prekur dhe qytetet e tjera të Shqipërisë, duke i dhuruar atyre një atmosferë vezëllitëse. Ja dekoret e Gjirokastrës dhe Shkodrës.