Kisha e Shën e Premtes në fshatin e Lukovës, një monument kulturor i rëndësishëm, do të restaurohet së shpejti.

E përfshirë në zonën e rrezikut për shkak të gjendjes të rrënuar, kisha do të shpëtohet prej këtij restaurimi, shprehet ministrja e kulturës, Elva Margariti, në Instagram.

Kisha e Shën e Premtes mes ullishteve në Lukovë. Foto nga Albanian Archaeology.

Kjo kishë e tipit bazilikë (nga greqishtja e lashtë, portiku mbretëror), e ndërtuar mbi një kodër, daton që nga shekulli i XVII-të. E pozicionuar në lagjen perëndimore të Lukovës, kisha ndodhet, pothuajse e braktisur, në mes të një ullishteje.

Pastrimi i kishës. Foto nga Albanian Archaeology.

Kisha bën pjesë në grupin e bazilikave me kupolë. Në të mund të hyhet prej dy dyerve, një në anën jugore dhe tjetra në anë perëndimore. Kisha ka gjashtë kolona, mbi të cilat kalojnë harqe. Veçanërisht e rëndësishme ishte kulla e këmbanës, e dhuruar nga mbreti i Napolit në 1695, e cila u zhduk në 1967, me shkatërrimin e shumë kishave dhe xhamive gjatë periudhës të diktaturës.

Plazhi i Lukovës. Foto nga Matthew Storer.

Kisha është një prej objekteve më interesantë që duhen vizituar në Lukovë, fshatin e bukur bregdetar, 20 kilometra larg Sarandës. Lukova njihet për vijën e gjatë bregdetare dhe për një nga plazhet më pak të populluara e më të bukura të jugut. Mbetet plazhi i preferuar i shpirtrave të qetë dhe vetmitarë, e mund të konsiderohet si një nga vendet më të paprekura e të pazbuluara të jugut të Shqipërisë.