Foto nga ekspozita “Kolë Idromeno në retrospektivë”

Një nga mjeshtrat më të mëdhenj të pikturës shqiptare, Kolë Idromeno, sillet përmes një ekspozite të veçantë në Galerinë Kombëtare të Arteve. Që nga piktura “Motra Tone”, e njohur ndryshe dhe si “Mona Liza shqiptare”, e pikturuar në 1883, deri tek tabloja e përmasave danteske “Dy rrugët”, publiku do të njihet me kryeveprat e Idromenos, që si rrallëherë ekspozohen pranë njëra tjetrës. Në fokus të ekspozitës janë dhe fotografitë e Idromenos, si dhe disa objekte etnografike të cilat kanë shërbyer si burim inspirimi për realizimet artistike të tij. Ekspozita do të qëndrojë e hapur deri më datë 8 shtator, nga e hëna në të dielë, orari 10:00 – 18:00. Ajo vjen e kuruar nga Erzen Shkololli, me këshilltarë Eleni Laperin, Zef Pacin si dhe Afërdita Onuzin.