Book Your Stay
Book Your Flight
Ligatina Vjosë-Nartë njihet si zonë ku gjejnë strehë lloje të ndryshme shpendësh. Ajo është një kompleks ligatinor me një rëndësi të jashtëzakonshme për llojet migratore të shpendëve, dimërues dhe ata folezues.
Ky ekosistemi lagunor bregdetar, prej vitesh është kthyer në një atraksion turistik për vëzhgimin e shpendëve që shumohen në të. Për specialistët laguna Vjosë-Nartë është një oaz i paqtë për folezimin e shumë shpendëve, mes tyre ka edhe të rrallë. E pozicionuar në veri të qytetit të Vlorës kjo lagunë gëzon statusin e “Peizazhit të Mbrojtur” dhe njihet si zonë kyçe për biodiversitetin në një nivel global, me emrin “Vjosë – Nartë-Pishë Poro-Laguna e Nartës”.
Një lajm të mirë na përcjell Shoqata “Shpendët e Shqipërisë”, në rrjetet e saj sociale, ajo shkruan se konfirmohet për herë të parë folezimi i qyqes me çafkë në zonën e mbrojtur Vjosë-Nartë.
Ndër të tjera thekson se ‘Qyqja me çafkë (Clamator glandarius) është lloj që shihet tepër rrallë në Shqipëri gjatë periudhës së kalimit, dhe akoma më rrallë gjatë asaj të folezimit.’’
Popullata folezuese e këtij lloji në Shqipëri është raportuar në nivelet e 1-9 çiftesh dhe vetëm në zonën ligatinore Shkumbin-Seman dhe atë të Drinos. Kjo gjetje e fut edhe Vjosë-Nartën në territoret e folezimit të këtij lloji.
Shoqata “Shpendët e Shqipërisë” tha se “kjo gjetje e jona e fut edhe Vjosë-Nartën në territoret e folezimit të këtij lloji. Kërkuesit tanë, për herë të parë e hasën çiftin e qyqes me çafkë në fillim të muajit prill dhe më tej territori është vizituar disa herë deri në fillim të muajit maj duke e hasur çiftin në çdo vizitë kërkimore”.
“Në një rast qyqja me çafkë u vërejt fare pranë folesë së një laraske, që me shumë gjasë është një prej foleve ku ka lëshuar së paku 1 vezë, pasi sikurse dihet, të dy llojet e qyqeve që hasen në vendin tonë janë parazitare të foleve të shpendëve të tjerë (kryesisht të llojeve të familjes së korbave)”, – thekson shoqata “Shpendët e Shqipërisë”.
Kjo gjetje dëshmon edhe njëherë diversitetin e lartë të shpendëve në Zonën e Mbrojtur Vjosë-Nartë dhe veçanërisht në habitatet tokësorë gjysmënatyralë që shtrihen kryesisht në pjesën veriperëndimore.
Tesi Kerenxhi “Qyteti i një mbi një dritareve” falë vlerave historike, kulturore dhe turistike, është pjesë e trashëgimisë kulturore botërore...
Read More
Bukuritë shqiptare janë kthyer në një destinacion turistik të dashur për të huajt, dhe këtë gjithnjë e më shumë po...
Read More
Përmeti nuk është vetëm vendi i destinacioneve magjepsëse, por edhe qytet i cili të mahnit me histori. Ditët e fundit...
Read More