Një prej objekteve arkitektonike më të njohur dhe të përfolur të kryeqytetit do të ketë jo vetëm pamje por edhe funskion të ri.

Projekti për rijetëzimin e Piramidës është aprovuar me kohë por më në fund, puna për realizimin e tij ka filluar. Për shumë, kjo ndërhyjrë është e mirëpritur, pasi ky objekt i rëndësishëm ndodhet në një ndër pikat kryesore të bulevardit qendror të Tiranës. Një herë e një kohë, struktura moderniste e zbukuronte këtë korridor të rëndësishëm të kryeqytetit. Fatkeqësisht, ndër vite, ajo u sulmua e më pas u la pas dore, duke u kthyer në diçka të rrënuar dhe aspak të bukur. Megjithatë, ajo mbijetoi të shihte ditën e rijetëzimit të saj.

Historia e Piramidës është a gjatë e plot kthesa të papritura, po aq të bukura sa edhe të trishta, po aq komike sa edhe tragjike. Një gjë mbetet e sigurt, nga monument dedikuar Enver Hoxhës tek rëshkitësja më popullore në vend, Piramida dhe veshtjet e saj të ndryshme janë vetë historia e Tiranës. Veshja e saj e re, e cila filloi të marrë formë pikërisht në 4 shkurt të 2021-shit, premton të tregojë historinë e momentit dhe të ardhmen e qytetit.

Projekti i ri i Piramidës nga MVRDV. Foto nga Arch Daily.

Hap pas hapi me teknologjinë e kohës

Ky rijetëzim mund t’a kthejë përsëri Piramidën në një objekt zbukurues të qytetit. Identiti i saj i ri përmban atë të vjetrin, por synon drejt të ardhmes. Ashtu si një herë e një kohë Piramida ishtë shtëpia e televizionit me teknologjinë më të lartë në vend, Top Channel-it, ashtu edhe e ardhmja e Piramidës do të vazhdojë me hapin e teknologjisë. Projekti i ri premton një Piramidë e cila mund ta kthejë Tiranën në pikë referimi për rajonin e Ballkanit.

Piramida, Tiranë, foto nga IntoAlbania.

Projekti

Piramida origjinale, krijuar nga ekipi i katër arkitektëve shqiptarë – Pranvera Hoxha (vajza e Enver Hoxhës, Klement Kolaneci, dhëndri i tij, Pirro Vaso dhe Vladimir Bregu, dy arkitektë të njohur të kohës, – do të rijetëzohet falë projektit të firmës hollandeze MDRDV.

Projekti i rivitalizimit të Piramidës së Tiranës synon transformimin e saj në një qendër multifunksionale në qytet, duke siguruar hapësirë për të rinjtë dhe njerëzit që të angazhohen në art, kulturë dhe teknologji krijuese. Animacion, zhvillimi i videogames, kinematografi, web design, arte dhe muzikë, dizajn grafik dhe modelim 3D, fotografi dhe media të reja. Këto janë disa prej aktiviteteve që mund të presim nga projekti i ri.

Projekti i ri i Piramidës nga MVRDV. Foto nga Arch Daily.

Cilat do të jenë ndryshimet?

Sipërfaqja 11,835 m2 e Piramidës do të ruhet ashtu si në projektin origjinal. Veshja e jashtme do të ndryshojë por duke ruajtur dhe ricikluar pllakat e mbetura të shkallëve dhe mureve në përbërjen e re. Ndërhyrja do të hapë atriumin dhe mjedisin përreth, ndërsa një sërë kafenesh, studiosh, dhomash do të përhapen në të gjithë ambientin e Piramidës. Ashtu si edhe projekti origjinal i ka dhënë Piramidës “krahë” (nga pamje ajrore, Piramida është në fakt shqiponjë!) po ashtu edhe projekti i ri do ti zgjasi ato krahë drejt qytetit, duke e përqafuar atë e duke e përfshirë në zemrën e Piramidës. Thënë ndryshe, Piramida do të kthehet në një pike kyçe të socializimit dhe të kulturës së qytetit e, ndoshta, edhe vendit apo rajonit.

Projekti i ri i Piramidës nga MVRDV. Foto nga Arch Daily.

Një rrugë e disa punë

Një element tjetër interesant i projektit të ri është fakti se Piramida e re do të ketë koridorre të brendshme të cilat përshkojnë të gjithë sipërfaqen e saj, duke hapur kalimin e brendshëm nga një anë te tjetra. Për ata që “kalojnë nga Piramida” për të mbërritur në zyrat e tyre, këto korridore do ti lejojnë ti “bien rrugës shkurt.” Më në fund, do të kemi mundësinë të “rrëshkasim” përmes Piramidës!

“Pjesa sfiduese është krijimi i një marrëdhënie të re midis ndërtesës dhe rrethinës së saj. Unë kam besim se dizajni ynë e arrin këtë qëllim. Mezi po pres të shoh të rinj dhe për herë të parë njerëz të moshuar që i ngjiten shkallëve deri në çati!” – Winy Maas, partneri themelues i MVRDV.

Për më tepër detaje dhe fotografi mbi projektin e ri të Piramidës, klikoni këtu.

Për historinë e Piramidës, klikoni këtu.