Edhe pse tërmeti shkatërrues i 26 nëntorit duket një ditë e largët tashmë, eklipsuar nga lajmet e një pasnjëshme që i referohen pandemisë globale, dëmet që ai shkaktoi janë ende të pranishme, sidomos në monumentet e trashëgimisë kulturore në vend.

Projekti, që vjen si ndihmë nga ana e Ambasadës së Shteteve të Bashkuara nëpërmjet Fondit të Ambasadorëve për Trashëgiminë Kulturore, mendohet se do të zgjasë rreth dy vjet. Ai do të restaurojë fortifikimet e Krujës, Durrësit dhe Prezës.

Sipas marrëveshjes së firmosur pak ditë më parë mes ambasadores amerikane, znj. Yuri Kim dhe ministres shqiptare të kulturës, znj. Elva Margariti, restaurimi do të nisë me Kullën C në Durrës. Ajo do të pasohet nga restaurimi i Teqesë së Dollmës, monument kulture i kategorisë së parë, ndërtuar në vitin 1778, në Kalanë e Krujës. Projekti do të quhet i përfunduar me restaurimin e Kalasë së Prezës që gjithashtu rezultoi e dëmtuar.

Kujtojmë se Fondi i Ambasadorëve për Zhvillim, ka mbështetur financiarisht edhe restaurime të tjera të objekteve të trashëgimisë kulturore në Shqipëri si atë të Galerisë Nr. 3 të Kalasë, në Gjirokastër, apo ruajtjen e Kullës së Sahatit , në Tiranë. Por siç është shprehur vetë ambasadorja Kim në fjalën e saj, “ky është projekti ynë më i madh i Fondit të Ambasadorëve për Trashëgiminë Kulturore në Shqipëri deri më sot”.

Të treja këto qytete, me vlerat e tyre të trashëgimisë kulturore janë pjesë e thuajse të gjitha tureve kulturore në vend dhe për rrjedhojë me një rëndësi thelbësore për një tjetër sektor, që ashtu si dëmtimet nga tërmeti është përkulur nga dëmi i shkaktuar nga pandemia, sektori i turizmit. Rikthimi i këtyre objekteve komunitetit është edhe një mundësi për rijetëzimin e turizmit në vend.