Kalaja e Borshit: Nën gjurmët e antikitetit - Into Albania

Kalaja e Borshit: Nën gjurmët e antikitetit

Turizëm Detar

Kalaja e Borshit: Nën gjurmët e antikitetit

Turizëm Detar

Një kala me vlera të rëndësishme historike e arkitektonike, një trashëgimi e rrallë e kulturës së vendit tonë, Kalaja e Borshit ju jep edhe rastin të shijoni bukurinë e peizazhit të Borshit nga lart.

Pamje e Kalasë së Borshit. Foto nga IntoAlbania.

Borshi, i cili është vetëm 17 km larg Himarës, ka vijën bregdetare më të gjatë të Jonit. I rrethuar nga ullishtet që pozicionohen natyrshëm me blunë e paqtë të detit, Borshi është një vend që të nxit ta vizitosh jo vetëm për peizazhin, por dhe për historinë që shfaqet hijshëm në çdo cep të tij.

Plazhi i Borshit. Foto nga IntoAlbania

Kalaja e Borshit, rëndësia e një fortifikimi të lakmuar

Kalaja e Borshit, e cila është ndërtuar mbi rrënojat e qytetit antik, ndodhet vetëm 3 km në veriperëndim të Borshit. Ajo ngrihet mbi një kurriz të lartë malor rreth 500 m mbi nivelin e detit, e ku  muret rrethuese të saj arrijnë deri në 10 m. Kjo kala daton që në shek e IV – III p.k., dhe që në krye të herës ka pasur një pozicion strategjik, duke qenë një urë lidhëse mes maleve Akrokeraune (Llogarasë) dhe detit. Pozicioni i përshtatshëm gjeografik me ujërat e shumta dhe malet përreth, ka favorizuar banimin e kësaj treve që nga lashtësia.

Muret e kalasë së Borshit. Foto nga IntoAlbania.

Brenda kalasë, ku dikur lulëzonte një qytet i tërë, sot duken vetëm rrënojat e këtyre mureve të vjetra. Ajo ka qenë e lakmuar nga të gjithë pushtuesit që kanë ardhur në këto anë, që nga romakët, biznantinët e deri tek osmanët. Në mesjetë, ajo njihet si Kalaja e Sopotit, ku përmendet dhe në kujtimet e Ana Komnenës, vajzës së Perandorit të Bizantit Aleksi I Komnenai, në vitin 1192.

Hyrja e kalasë. Foto nga IntoAlbania.

Xhamia e vetme e Rivierës Shqiptare

Periudhën më të artë të zhvillimit kjo kala e pati në kohën e Ali Pashë Tepelenës, ku në të u ndërtua edhe xhamia nga Haxhi Bendo, e vetmja në Rivierën Shqiptare. E vendosur pranë hyrjes kryesore të kalasë, xhamia është në gjendje të mirë, pavarsisht se minareja është rrëzuar. Kjo xhami, e cila rri hijshëm mbi kreshtën e malit, është e tipit sallë kupolë, ka përmasa jo të vogla e dallohet për ndërtimin me gurë të punuar.

Xhamia e kalasë së Borshit. Foto nga IntoAlbania.

Nëse do të vizitoni Borshin, do të gjeni një buqetë ku ndërthurret legjenda, historia dhe natyra. I parë nga lartësitë e kalasë, Borshi tregon bashkëjetesën e qetë mes valëve që përqafojnë bregun e detit e relievin kodrinor e malor, duke i dhënë një bukuri të rrallë këtij peizazhi.

Nga: IntoAlbania

Zbulo më Saranda

More of your interest

What’s Hot?

Zhvilluar nga Frakton & Dizajnuar nga project.graphics